मुख्यमंत्रीपदी बसण्यासाठी मिंधे कोण झाले?

मुख्यमंत्रीपदी बसण्यासाठी मिंधे कोण झाले? 

 उबाठा गटाचे प्रमुख उद्धव बाळासाहेब ठाकरे, उबाठा गटाचे 'उत' आलेले खासदार, प्रवक्ते सातत्याने मुख्यमंत्री एकनाथ शिंदे यांचा उल्लेख मिंधे म्हणून करत असतात. पण खरे मिंधे उद्धव बाळासाहेब ठाकरे हेच आहेत. सत्तेसाठी, मुख्यमंत्रीपदावर बसण्यासाठी त्यांनीच मिंधेगिरी केली.

महाविकास आघाडी आणि गद्दारी या शब्दाचे जनक, मूळपुरुष शरद पवार यांनी काही वर्षांपूर्वी शिवसेना फोडली. त्याआधी वसंतदादा पाटील यांच्या पाठीत खंजीर खुपसून, त्यांचे सरकार पाडून, आमदार फोडून म्हणजे गद्दारांना बरोबर घेऊन ते मुख्यमंत्री झाले होते. असो. 

तर याच शरद पवार यांनी काही वर्षांपूर्वी शिवसेनेचे छगन भुजबळ आणि अन्य काही आमदार फोडले. पवार तेव्हा कॉंग्रेस आय पक्षात असल्याने त्यांनी या सर्वांना कॉंग्रेस आय पक्षात प्रवेश दिला. याच गद्दार भुजबळ यांना शरद पवार यांनी राष्ट्रवादी काँग्रेस पक्षाचे प्रदेशाध्यक्ष, पुढे उपमुख्यमंत्रीपद दिले.

भुजबळ यांचे शिवसेनेतून अशा प्रकारे बाहेर पडणे बाळासाहेब ठाकरे यांच्या जिव्हारी लागले.‌ ठाकरे आणि शिवसेनेकडून भुजबळ यांचा उल्लेख कायम 'लखोबा लोखंडे' या शेलक्या शब्दात केला जायचा. भुजबळ यांच्या शासकीय निवासस्थानी संतप्त शिवसैनिकांनी हल्ला केला होता. पुढे याच भुजबळांनी बाळासाहेब ठाकरे यांना अटक केली.‌

हा सर्व इतिहास माहित असताना, ज्या शरद पवार यांनी शिवसेना फोडली, ज्या गद्दार भुजबळ यांनी शिवसेनाप्रमुख बाळासाहेब ठाकरे यांना अटक केली, ज्या भुजबळ यांनी बाळासाहेब ठाकरे यांची 'टी बाळू' अशी टिंगल टवाळी केली त्या पवार, भुजबळ यांच्याशी, त्यांच्या राष्ट्रवादी काँग्रेसशी हातमिळवणी करून मुख्यमंत्रीपद मिळवले, गद्दार भुजबळ यांच्यासोबत अडीच वर्षे काम केले. मुख्यमंत्रीपदावर बसण्यासाठी ही मिंधेगिरी नाही तर काय होते? 

मला मुख्यमंत्री करणार असाल तर गद्दार भुजबळ मंत्रीमंडळात नको, अशी भूमिका का घेतली नाही? ( शरद पवार यांनी तुमचे म्हणणे मान्य केले असते किंवा नसते हा नंतरचा प्रश्न) किमान तसे जाहीरपणे एकदाही का बोलला नाहीत? भुजबळांना मंत्रीमंडळात घेणार असाल तर मला मुख्यमंत्रीपद नको, अशी भूमिका का घेतली नाही? आपण असे बोललो आणि शरद पवार यांनी ते मान्य केले तर हातातोंडाशी आलेले मुख्यमंत्रीपद गमवावे लागेल, अशी भीती वाटली आणि मिंधेपणा पत्करून एकदाचे मुख्यमंत्रीपदावर बसलात. 

शेखर जोशी

२२ जून २०२३

नंदन नीलेकणी तुम्हाला दंडवत!

नंदन नीलकेणी 

नंदन नीलेकणी तुम्हाला दंडवत!

आपण ज्या शाळेत, महाविद्यालयात शिकतो, शिक्षण पूर्ण करतो ती शाळा, महाविद्यालय यांच्या बाबतीत आपण सर्वजण कृतज्ञ असतो. आणि असलेच पाहिजे. शाळा/ महाविद्यालयाप्रती असलेली ही कृतज्ञता प्रत्येक विद्यार्थी आपापल्या परिने व्यक्त करत असतो. 

'आयआयटी' मुंबईचे माजी विद्यार्थी आणि इन्फोसिसचे सहसंस्थापक नंदन नीलेकणी यांनी कृतज्ञता म्हणून 'आयआयटी' मुंबईला तब्बल ३१५ कोटी रुपयांची (३८.५ मिलियन डॉलर्स) देणगी दिली आहे. 'आयआयटी' मुंबईत पायाभूत सुविधांची निर्मिती, उदयोन्मुख क्षेत्रातील संशोधनाला चालना देण्यासाठी नीलकेणी यांनी ही देणगी दिली आहे.

'आयआयटी'ला एका  माजी विद्यार्थ्याकडून मिळालेली ही आजवरची सर्वांत मोठी देणगी आहे. या आधीही नीलेकणी यांनी ८५ कोटींची देणगी 'आयआयटी' मुंबईला दिली होती. या देणगीतून नवीन वसतिगृहे बांधणे, स्कूल ऑफ इन्फॉर्मेशन टेक्नॉलॉजीला वीजपुरवठा करणे आणि देशाचे पहिले विद्यापीठ इनक्यूबेटर स्थापित करणे यासाठी होती. 

ही देणगी केवळ आर्थिक मदत नाही, तर आर्थिक मदतीपेक्षाही अधिक आहे.  ज्या संस्थेने मला खूप काही दिले त्या संस्थेप्रती हे  ऋण आहे, असे नीलकेणी सांगतात.

२१ जून २०२३

राष्ट्रवादीच्या उलट्या बोंबा!

राष्ट्रवादीच्या उलट्या बोंबा!

याला म्हणतात चोराच्या उलट्या बोंबा. तुमच्या पिताश्रींनी काही वर्षांपूर्वी आत्ताची उबाठा सेना फोडली होती. छगन भुजबळ यांच्यासह शिवसेनेचे अनेक आमदार (अर्थात मुख्यमंत्री एकनाथ शिंदे यांनी ज्या घाऊक प्रमाणात फोडले/ आपल्या बाजूने वळविले त्या तुलनेत तुमचे पिताश्री कमीच पडले) फोडून कॉंग्रेस आय पक्षात आणले होते. तेव्हा तुमचे पिताश्री या पक्षात होते.‌त्यावेळी कुठे गेला होता तुमचा धर्म...

तेव्हाची शिवसेना आणि शिवसेनाप्रमुख बाळासाहेब ठाकरे यांच्यासाठी भुजबळ यांच्यासह फुटलेले सर्व आमदार गद्दारच होते. पण तेव्हा पवार साहेबांनी शिवसेना फोडली म्हणून ते किती ग्रेट आहेत, कसे चतुर, चाणाक्ष, मुत्सद्दी आहेत म्हणून त्यांची आरती ओवाळली होती. वसंतदादा पाटील यांच्या पाठीत खंजीर खुपसून काही आमदार फोडून तुमच्या पिताश्रींनी ते सरकारही पाडले होते. म्हणजे खरे तर या गद्दारीची सुरुवात तुमच्या पिताश्रींनी केली आहे.

उबाठा गटाचे प्रवक्ते, खासदार जे 'उत' आल्यासारखे नेहमीच बोलत असतात त्यांनी तर षटकार ठोकला. संयुक्त राष्ट्र संघटनेला पत्र लिहून २० जून हा दिवस जागतिक गद्दार दिन म्हणून साजरा करावा, अशी मागणी केली. उबाठा गटाचे प्रमुख उद्धव बाळासाहेब ठाकरे यांनीही याची री ओढली. ( हा 'उत' आलेला माणूस वेळोवेळी उबाठा यांना आणि गटालाही अडचणीत आणतोय हे उबाठा यांना कधी कळणार? शिल्लक सेना पूर्णपणे संपेल बहुदा तेव्हा यांचे डोळे उघडतील)

'उत 'आलेले प्रवक्ते, खासदार आणि माननीय उबाठाजी अहो या गद्दारीचे जनक,मूळपुरुष तुमचेच बॉस आहेत याचा सोयिस्कर विसर पडला का? 

ज्या शिंदे यांना मिंधे मिंधे म्हणून शिव्या घालता त्या शिंदे यांच्या आधी मिंधेपण तुमच्याच साहेबांनी शरद पवार यांनी केले. एक वेळ मी अंगाला राख फासून हिमालयात जाईन पण पुन्हा कॉंग्रेस पक्षात प्रवेश करणार नाही, अशी गर्जना करणा-या तुमच्याच साहेबांनी तेव्हाचे पंतप्रधान राजीव गांधी यांच्या उपस्थितीत कॉंग्रेस पक्षात प्रवेश केला होता. ते मिंधेपण नाही तर काय होते? 

सोनिया गांधींच्या विदेशीपणाच्या मुद्द्यावरून कॉंग्रेसला सोडचिठ्ठी देऊन राष्ट्रवादी काँग्रेसची स्थापना करणा-या तुमच्या याच साहेबांनी नंतर सत्तेसाठी सोनिया गांधी आणि काँग्रेस आय पक्षाशी सूत जुळवून केंद्रात मंत्रीपद भुषवले. महाराष्ट्रात सत्ता उपभोगली. ते मिंधेपण नाहीतर काय होते? 

शिवसेना प्रमुख बाळासाहेब ठाकरे हे  छगन भुजबळ यांचा उल्लेख कायम 'लखोबा लोखंडे' असाच करत असत. तेव्हाच्या शिवसेनेसाठी छगन भुजबळ हे गद्दारच होते. आणि याच गद्दार छगन भुजबळ यांना (सुप्रियाताई तुमच्या पिताश्रींनी, 'उत' आलेले खासदारजी, महाविकास आघाडीचे माजी मुख्यमंत्री उद्धव बाळासाहेब ठाकरे तुमच्या बॉसनी)  अर्थात शरद पवार यांनी राष्ट्रवादी काँग्रेस पक्षाचे प्रदेशाध्यक्ष केले, उपमुख्यमंत्री केले. उद्धवराव याच गद्दार छगन भुजबळ यांच्याबरोबर तुम्हाला महाविकास आघाडीचे मुख्यमंत्री झाल्यानंतर काम केले. मांडीला मांडी लावून बसावे लागले होते. सुप्रियाताई, 'उत' आलेले खासदार आणि उद्धव बाळासाहेब ठाकरे हे ही तुम्ही विसरलात का? 

त्यामुळे तुम्ही सर्वजण आता काहीही बोललात, म्हणालात तरी गद्दारीचे खरे जनक शरद पवार हेच आहेत. 

शेखर जोशी

२० जून २०२३

उपमुख्यमंत्री आणि गृहमंत्री देवेंद्र फडणवीस गप्प का?

कोट्यवधी भारतीयांच्या मनातील रामाच्या प्रतिमेचे उघडपणे भंजन 

उपमुख्यमंत्री आणि गृहमंत्री देवेंद्र फडणवीस गप्प का? 

शेखर जोशी 

काश्मीर फाईल्स, केरळ स्टोरीला विरोध करणा-यांच्या विरोधात भाजपवाले आक्रमक झाले होते. तो आक्रमकपणा आता कोट्यवधी भारतीयांच्या मनातील राम, हनुमान आणि रामायणाच्या प्रतिमेला धक्का पोहोचविणा-या 'आदिपुरुष' विरोधात का नाही? उपमुख्यमंत्री देवेंद्र फडणवीस, भाजपच्या इतर बोलघेवड्या नेत्यांनीही या विषयावर मत/ प्रतिक्रिया व्यक्त केली नाही. किंवा आदिपुरुषच्या विरोधात चकार शब्द काढला नाही. सगळे मूग गिळून गप्प बसले आहेत.

देशभरातील विविध राज्यांमधील भारतीय जनता पक्षाच्या मुख्यमंत्र्यांची नावे 'विथ युवर ब्लेसिंग' या शीर्षकाखाली चित्रपटात दाखविण्यात आली आहेत म्हणे. यात महाराष्ट्राचे मुख्यमंत्री एकनाथ शिंदे, उपमुख्यमंत्री देवेंद्र फडणवीस यांचेही नाव आहे. चित्रपटात राम, हनुमान, रावण यांचे जे प्रतिमाभंजन केले आहे, आक्षेपार्ह संवाद असल्याचे सांगण्यात येत आहे, त्याला फडणवीस यांची मुकसंमती आहे का? आणि चित्रपटात दाखविण्यात आलेली राम, रावण, हनुमान यांची प्रतिमा तुम्हालाही पटली नसेल तर मला ती पटलेली नाही, त्यामुळे

'विथ युवर ब्लेसिंग' या शीर्षकाखाली टाकण्यात आलेले आपले नाव काढून टाकावे, असे तरी फडणवीस यांनी जाहीर करावे. पण या विषयावर त्यांची आणि मुख्यमंत्री एकनाथ शिंदे यांचीही अळी मिळी गुप चिळी आहे. 

सहा/आठ महिन्यांपूर्वी चित्रपटाची झलक (टिझर, ट्रेलर) प्रकाशित झाली तेव्हाच संपूर्ण देशभरात संतापाची लाट उसळली होती. याची दखल घेऊन चित्रपट परिनिरीक्षण मंडळाने चित्रपटात काही बदल करण्यास सांगितले होते. मात्र आता चित्रपट प्रदर्शित झाल्यानंतर समाजमाध्यमातून तीव्र संतापाच्या ज्या ठिणग्या उडत आहेत, ते वाचून/पाहून तसे कोणतेही बदल केले गेले नाहीत, हे दिसून येते. या हजारो/लाखो समाजमनांची, त्यांच्या भावनांची दखल किमान महाराष्ट्रापुरती तरी मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी घेतलेली नाही, ही चीड आणणारी गोष्ट आहे. 

मूळ शिवसेनेने आत्ताचा उद्धव बाळासाहेब ठाकरे गट यांनी हिंदुत्व सोडले म्हणून मुख्यमंत्री एकनाथ शिंदे यांनी ती शिवसेना सोडली. आता तर शिंदे यांचीच शिवसेना खरी यावरही निवडणूक आयोगाने शिक्कामोर्तब केले आहे. 'आदिपुरुष' मधून राम, हनुमान, रावण आणि एकूणच रामायणाचे जे प्रतिमाभंजन करण्यात आले त्याच्याशी शिंदे सहमत आहेत का? नसतील तर ते आपले नाव 'विथ युवर ब्लेसिंग' मधून काढायला सांगणार का? हिंदुत्ववादी म्हणून या टुकार, बीभत्स चित्रपटावर बंदी घालणार का? किमान चित्रपटात रामायण ज्या प्रकारे सादर करण्यात आले आहे ते आम्हाला मान्य नाही, अशी भूमिका घेणार का? 

आम्ही हिदुत्व सोडलेले नाही, असे उद्धव बाळासाहेब ठाकरे सतत सांगत असतात. पण या चित्रपटाच्या विरोधात त्यांनीही तोंड उघडलेले नाही. त्यांच्याच पक्षाचे माजी खासदार असलेल्या भारतकुमार राऊत यांच्या मुलाचा चित्रपट असल्याने उद्धव बाळासाहेब ठाकरे यांचीही अळी मिळी गुप चिळी आहे का? 

खरे तर हा चित्रपट बहिष्कार टाकून पूर्ण पूर्णपणे आपटवला पाहिजे. पण चित्रपट प्रदर्शित झाल्यानंतर पहिल्या एक, दोन दिवसांत जो गल्ला जमा झाला ते पाहता हे झालेले नाही, हे दिसून येते. आमच्या तमाम भारतीयांच्या मनात रामानंद सागर यांचेच रामायण आणि या मालिकेतील पात्र ठसलेली आहेत. त्यामुळे काहीतरी नवीन करण्याच्या कारणाने, हा आजच्या काळातील चित्रपट आहे असे सांगून ओम राऊत, संवादलेखक मनोज मुंतशीर यांनी सांगितले, त्यांनी ज्या प्रकारे चित्रपट सादर केला आहे, त्याचे समर्थन केले आहे ते अजिबात पटणारे नाही. 

चित्रपटातील 'रावण' मला आजच्या काळातील क्रूरकर्मा/राक्षस म्हणून दाखवायचा होता, असे ओम राऊत म्हणतात. मग ओसामा बिन लादेन, दाऊद इब्राहिम, सद्दाम हुसेन हे आजच्या काळातील क्रूरकर्मा, राक्षस आहेत/होते. म्हणून रावणाला यांच्या 'लूक' मध्ये दाखवणार का? राऊत यांचे हे स्पष्टीकरण आणि समर्थन चीड आणणारे आणि न पटणारे आहे. कोट्यवधी भारतीयांच्या मनात राम, हनुमान, रावण आणि एकूणच रामायणाविषयीची जी प्रतिमा आहे त्याला छेद देण्यासाठी/त्या प्रतिमेचे भंजन करण्यासाठीच 'आदिपुरुष' तयार केलाय का?😡 कोट्यवधी भारतीयांच्या मनातील रामाच्या प्रतिमेचे उघडपणे भंजन करणा-या चित्रपटावर बंदी घालण्याचे धाडस उपमुख्यमंत्री आणि गृहमंत्री देवेंद्र फडणवीस दाखवणार का? हा खरा प्रश्न आहे.  

शेखर जोशी 

#आदिपुरुषबहिष्कार 

#देवेद्रफडणवीस 

परकीय आक्रमकांनी पाडलेल्या देशभरातील मंदिरांचा केंद्र शासनाने जीर्णाेद्धार करावा

 

परकीय आक्रमकांनी पाडलेल्या देशभरातील 

मंदिरांचा केंद्र शासनाने जीर्णाेद्धार करावा

- वैश्विक हिंदु राष्ट्र महोत्सवा’त मंदिर विश्वस्तांची मागणी

फोंडा, दि. १७

गोवा राज्य शासनाने पोर्तुगीज आक्रमकांनी विध्वंस केलेल्या सर्व मंदिरांचा जीर्णोद्धार करण्याचा निर्णय घेतला आहे. त्याप्रमाणे देशभरात परकीय आक्रमकांनी पाडलेल्या सर्व हिंदू मंदिरांचा जीर्णाेद्धार करण्याचा निर्णय केंद्र शासनाने घ्यावा, अशी मागणी आज ‘वैश्विक हिंदु राष्ट्र महोत्सवा’त करण्यात आली. 

गोव्यात परकीय आक्रमकांनी नष्ट केलेल्या या सर्व मंदिरांचा जीर्णाेद्धार करून भारतीय संस्कृतीचे पुनरुज्जीवन करण्याचा महत्त्वपूर्ण निर्णय गोवा सरकारने घेतला. त्यानुसार प्राचीन श्री सप्तकोटेश्वर मंदिरांचा जीर्णाेद्धार गोवा सरकारने स्वत: केला. तसेच अन्य मंदिरांचा जीर्णाेद्धार करण्यासाठी एक समिती स्थापन करून पुढील प्रक्रिया चालू केली आहे, अशी माहिती महाराष्ट्र मंदिर महासंघा’चे समन्वयक सुनील घनवट यांनी फोंडा गोवा येथे पत्रकार परिषदेत दिली.

‘काशी येथील ज्ञानवापी मुक्तीसाठी न्यायालयीन लढा देणारे’ सर्वाेच्च न्यायालयातील अधिवक्ता विष्णु शंकर जैन, ‘गोमंतक मंदिर महासंघा’चे जयेश थळी, ‘ज्योतिर्लिंग श्रीक्षेत्र भीमाशंकर देवस्थाना’चे अध्यक्ष अधिवक्ता सुरेश कौदरे आणि विदर्भ येथील ‘देवस्थान सेवा समिती’चे सचिव अनुप जयस्वाल यावेळी उपस्थित होते. 

 मंदिर संस्कृतीचे रक्षण होण्यासाठी ही मंदिरे जपली पाहिजेत, वाढली पाहिजेत यासाठी गोव्यात ‘गोमंतक मंदिर महासंघ’ तर महाराष्ट्रात ‘महाराष्ट्र मंदिर महासंघ’ कार्य करत आहे. महाराष्ट्रात आम्ही १३१ मंदिरांमध्ये वस्त्रसंहिता लागू केली असल्याचे घनवट यांनी सांगितले.

काशीनंतर मथुरा आणि कर्नाटक राज्यातील श्री हनुमंताचे जन्मस्थान असलेल्या किष्किंधा यांच्या मुक्तीसाठी लढा उभारण्यात येणार असल्याची माहिती ‘सर्वाेच्च न्यायालयातील अधिवक्ता विष्णु शंकर जैन यांनी दिली.  

मशिदीतील इमाम आणि मुल्ला-मौलवी यांना वेतन, तसेच मदरशांना यांना अनेक राज्यांत सरकार अनुदान देत आहे. मग मंदिरातील हिंदू पुजार्‍यांना वेतन का दिले जात नाही ? असा प्रश्न 

अधिवक्ता सुरेश कौदरे यांनी उपस्थित केला.

जयेश थळी, अनुप जयस्वाल यांनीही मनोगत व्यक्त केले. 

एकत्रित आलेली हिंदू शक्ती हिंदु राष्ट्र निर्माणासाठी जोडली जाईल- डॉ. चारुदत्त पिंगळे

डावीकडून डॉ.चारुदत्त पिंगळे, हरिशंकर जैन, श्रीराम ज्ञानीदास महात्यागी महाराज, भागिरथी महाराज, भागवताचार्य (अधिवक्ता)  राजीवकृष्णजी महाराज झा, महंत दीपक गोस्वामी

एकत्रित आलेली हिंदू शक्ती हिंदु राष्ट्र 

निर्माणासाठी जोडली जाईल- डॉ. चारुदत्त पिंगळे 

‘जयतु जयतु हिन्दुराष्ट्रम्’च्या उद्घोषात हिंदू राष्ट्र अधिवेशन  सुरू

फोंडा, गोवा. 

‘वैश्विक हिंदू राष्ट्र महोत्सव’ म्हणजे एक प्रकारचे लोकमंथन असून या लोकमंथनातून एकत्रित आलेली ही हिंदू शक्ती हिंदू राष्ट्र निर्माणाच्या विश्वकल्याणकारी कार्यासाठी जोडली जाईल, असे प्रतिपादन हिंदू जनजागृती समितीचे राष्ट्रीय मार्गदर्शक डॉ. चारुदत्त पिंगळे यांनी आज (शुक्रवारी) येथे केले.

हिंदू जनजागृती समितीतर्फे श्री रामनाथ देवस्थान’, फोंडा, गोवा येथे आयोजित करण्यात आलेल्या ११ व्या ‘वैश्विक हिंदू राष्ट्र महोत्सवा’च्या अर्थात ‘हिंदू राष्ट्र अधिवेशना’च्या उदघाटनप्रसंगी ते बोलत होते.

खालिस्तानचा आतंकवाद, श्रीरामनवमी-हनुमानजयंती अशा सणांना दंगलींचे वाढलेले प्रमाण, समलिंगी विवाहाचे समर्थन,‘लिव्ह इन रिलेशनशीप’च्या व्यभिचाराला मान्यता, अश्लीलतेचे वाढते प्रस्थ, अनैतिकतेला संवैधानिक करण्याचे प्रयत्न यांसह अनेक आव्हाने सध्या हिंदूंसमोर आहेत. या सर्व समस्यांवर ‘सेक्युलर’ राज्यव्यवस्थेत कोणतेही उत्तर नसून शाश्वत हिंदु राष्ट्र हेच त्यावर उत्तर आहे, असेही डॉ. पिंगळे यांनी सांगितले. 

‘हलाल’च्या माध्यमातून चालू असणार्‍या आर्थिक आक्रमणाला उत्तर दिले पाहिजे. ‘हलाल जिहाद’च्या माध्यमातून प्रत्येक क्षेत्र, व्यवसाय मुसलमान ताब्यात घेत आहेत. त्याला प्रत्युत्तर देण्यासाठी प्रत्येक व्यवसायात हिंदूंना जोडून आपली आर्थिक शक्ती वाढवून त्याला उत्तर द्यावे लागेल, असे मुंबई- दादर येथील स्वातंत्र्यवीर सावरकर राष्ट्रीय स्मारकाचे कार्याध्यक्ष रणजित सावरकर म्हणाले.

सनातन संस्थेचे संस्थापक डॉ. जयंत आठवले लिखित अनमोल शिकवण’ (खंड १) : साधना प्रत्यक्ष शिकवण्याच्या पद्धती’, या हिंदी आणि मराठी या ग्रंथाचे प्रकाशन भागवताचार्य श्री राजीवकृष्णजी महाराज झा, पू. भागिरथी महाराज, 

रामज्ञानीदास महात्यागी महाराज, अधिवक्ता हरिशंकर जैन, महंत दीपक गोस्वामी यांच्या हस्ते, तर डोंबिवली येथील दुर्गेश परुळकर यांच्या ‘महाभारतातील अलौलिक चरित्रे : खंड १, निष्काम कर्मयोगी भीष्म’ या ग्रंथाचे प्रकाशन दुर्गेश परुळकर, डॉ. चारुदत्त पिंगळे, केरलीय क्षेत्र परिपालन समितीचे आचार्य पी.पी. एम्. नायर, प.पू. यतीमाँ चेतनानंद सरस्वती यांच्या हस्ते झाले. 

अधिवेशनाचा प्रारंभ शंखनादाने आणि मान्यवरांच्या हस्ते दीपप्रज्वलनाने करण्यात आला. दीपप्रज्वलनानंतर वेदमंत्रांचे पठण झाले. सनातन संस्थेचे संस्थापक डॉ. जयंत आठवले यांच्या संदेशाचे वाचन सत्यवान कदम यांनी केले.

 श्रृंगेरी येथील दक्षिणम्नाय श्री शारदा पिठाचे जगद्गुरु शंकराचार्य श्री श्री श्री भारती तीर्थ महाराज यांचे उत्तराधिकारी जगद्गुरु शंकराचार्य श्री श्री श्री विधुशेखर भारती महाराज यांचा ध्वनीचित्रफित संदेश दाखविण्यात आला. कर्नाटक येथील पेजावर मठाचे श्री विश्वप्रसन्नतीर्थ स्वामी यांच्या संदेशाचेही वाचन करण्यात आले. 

अधिवेशनाचे थेट प्रक्षेपण हिंदू जनजागृती समितीच्या HinduJagruti.org या संकेतस्थळावर तसेच ‘HinduJagruti’ या ‘यु-ट्यूब’ चॅनेलवर करण्यात येत आहे. येत्या २२ जूनपर्यंत हे अधिवेशन चालणार आहे.

१६ जून २०२३

हिंदू राष्ट्र अधिवेशनात ‘गोवा फाइल्स’ संदर्भात चर्चा

हिंदू राष्ट्र अधिवेशनात ‘गोवा फाइल्स’ संदर्भात चर्चा  

हिंदू जनजागृती समितीतर्फे १६ ते २२ जून या कालावधीत फोंडा गोवा येथे होणा-या ११ व्या हिंदू राष्ट्र अधिवेशनात 'गोवा फाईल्स' वर चर्चा होणार आहे, अशी माहिती हिंदू जनजागृती समितीचे राष्ट्रीय प्रवक्ते रमेश शिंदे यांनी पणजी, गोवा येथे दिली.

हिंदू राष्ट्र अधिवेशनाच्या निमित्ताने आयोजित पत्रकार परिषदेत ते बोलत होते.‌ हिंदू जनजागृती समितीचे धर्मप्रचारक नीलेश सिंगबाळ, सनातन संस्थेचे राष्ट्रीय प्रवक्ते चेतन राजहंस, हिंदू विधीज्ञ परिषदेचे गोवा राज्य सचिव, अधिवक्ता नागेश जोशी यावेळी उपस्थित होते.

काश्मीरमध्ये हिंदूंवर झालेल्या अनन्वित अत्याचाराला ‘दी कश्मीर फाइल्स’ या चित्रपटाने वाचा फोडली. त्यानंतर ‘दी केरळ स्टोरी’ चित्रपटातून ‘लव्ह जिहाद’च्या माध्यमातून हिंदु मुलींना धर्मांतरित करून त्यांचा जिहादी आतंकवादासाठी वापर करण्याचे षड्यंत्र मांडण्यात आले. गोव्यातही पोर्तुगिजांनी ‘इन्क्विझीशन’च्या नावाखाली जनतेवर केलेले अमानवी अत्याचार संपूर्ण देशाला कळणे आवश्यक आहे, असे शिंदे म्हणाले.

ख्रिस्ती धर्मगुरु पोप विश्वभरात अनेक ठिकाणी जाऊन ख्रिस्त्यांकडून झालेल्या अमानुष अत्याचारांची जाहीर माफी मागत असतात. तशी माफी गोव्यातील जनतेची त्यांनी आतापर्यंत का मागितलेली नाही ? असा प्रश्नही शिंदे यांनी उपस्थित केला.

‘महाराष्ट्र मंदिर महासंघा’च्या वतीने महाराष्ट्रभरातील मंदिरांमध्ये वस्त्रसंहिता राबवण्याचा उपक्रम चालू आहे. आतापर्यंत 131 हून अधिक मंदिरांनी वस्त्रसंहिता लागू केली असून देशभरात त्याचे मोठ्या प्रमाणात अनुकरण चालू झाले आहे. उत्तराखंड राज्यातही तीन मंदिरांनी याचे अनुकरण केले आहे. महाराष्ट्राप्रमाणेच गोवा, कर्नाटक, छत्तीसगड, देहली आदी राज्यांतही याप्रमाणे राज्यस्तरीय मंदिर परिषदांचे भविष्यात आयोजन करण्यात येणार आहे, असे ‘सनातन संस्थे’चे राष्ट्रीय प्रवक्ते चेतन राजहंस यांनी सांगितले.‌ 

हिंदु जनजागृती समितीचे धर्मप्रचारक नीलेश सिंगबाळ म्हणाले, या ‘वैश्विक हिंदु राष्ट्र महोत्सवा’ला स्वातंत्र्यवीर सावरकर यांचे नातू रणजित सावरकर, काशी-ज्ञानवापी मुक्तीसाठी न्यायालयीन लढा देणारे अधिवक्ता विष्णु शंकर जैन, तेलंगाणा येथील हिंदुत्वनिष्ठ आमदार टी. राजासिंह, ‘हिंदु इकोसिस्टिम’चे संस्थापक कपिल मिश्रा, ‘विश्व हिंदु परिषदे’चे संपर्कप्रमुख धर्माचार्य ह.भ.प. जनार्दन महाराज मेटे यांच्यासह अनेक उद्योजक, विचारवंत, लेखक, मंदिर विश्वस्त, तसेच अनेक समविचारी सामाजिक, राष्ट्रीय आणि आध्यात्मिक संघटनांचे प्रतिनिधी उपस्थित रहाणार आहेत. 

हिंदू राष्ट्राचे आंदोलन संवैधानिक मार्गाने होण्यासाठी, तसेच हिंदुहिताच्या मुद्द्यांवर न्यायालयीन संघर्ष करण्यासाठी अधिवक्त्यांची मोठी भूमिका आहे. या दृष्टीने या हिंदु राष्ट्र महोत्सवात दीडशेहून अधिक अधिवक्ते सहभागी होणार असल्याची माहिती हिंदू विधीज्ञ परिषदेचे अधिवक्ता नागेश जोशी यांनी दिली.‌

या अधिवेशनामध्ये राष्ट्रीय पातळीवर, तसेच राज्य आणि जिल्हा पातळीवर हिंदु संघटनांच्या एकत्रिकरणातून ‘हिंदु राष्ट्र समन्वय समिती’ स्थापन करण्यासाठी प्रत्यक्ष नियोजन करण्यात येणार आहे. अधिवेशनाचे थेट प्रक्षेपण हिंदु जनजागृती समितीच्या HinduJagruti.org या संकेतस्थळावर तसेच ‘HinduJagruti’ या ‘यु-ट्यूब’ चॅनेल आणि facebook.com/hjshindi1 या फेसबुक पेजवरद्वारेही केले जाणार आहे. जगभरातील हिंदुत्वनिष्ठांनी या ‘वैश्विक हिंदु राष्ट्र महोत्सवा’चा लाभ घ्यावा, असे आवाहन हिंदु जनजागृती समितीच्या वतीने करण्यात आले.